Mar 9 | BJR | STEP | Yísufa káqi qímannimidanoo maa-ufána faqa qímanniminoo qinau, ínnee íriaqa ínnee maaqóo máriasakiqari akaqáusa sía kúqirai káqi márina kamuqoo Ánutuna quqúsa afeekaikámándee qúmirana ínnee miná qáfeefaranoo. Sía taikára faasaanara qídaqa káqi kasaaqaíndari qúmiranara qídaqa.

Mark 9

1 Yísufa káqi qímannimidanoo maa-ufána faqa qímanniminoo qinau, ínnee íriaqa ínnee maaqóo máriasakiqari akaqáusa sía kúqirai káqi márina kamuqoo Ánutuna quqúsa afeekaikámándee qúmirana ínnee miná qáfeefaranoo. Sía taikára faasaanara qídaqa káqi kasaaqaíndari qúmiranara qídaqa.

Áaqanasaa Yísufa innaarúna áfiri máranau.

(Mataioo 17:1-13; Ruka 9:28-36)

2 Dóo miqóoqari dínni qísauku taikásee dínni ani moodáa marasée áfuru faiqéenoo dóo fíndimeeqeenoo Yísufa Peetooroona faqa Yameesana faqa Yoohaneena faqa dóo minamúsa faqa áaqana kísaaqasaa nífiqamaree óorureenoo áadumasaa sía faiqí máruqoo óorureenoo miqóo misá nífusaa Yísuna afaaqa qamunna moo kámmafinau. 3 Miná qamunna aiqáma dupúqa aruáqufufanoo aiqáma éekara aruáqufufanoo nífu faqa dároo dáraa inau. Sía maqásaaqaraa fasiqa amana qamunna miqímandeeqa nammári uqusáifanoo éekara arinoo dupúqara foo aruáquannoo. 4 Eeriaasa faqa Mooseesa faqa óoqai tamummáqara fasiqaqanda máridaqa kúqiqa óoru fúqanda miqóo áaqanasaa Yísuna faiqinámu nífusaa kooroomáfufaqa Yísuna faqa ufa qímarufaqa Yísuna faiqinámu níndafaqau. 5 Níndafaidaqa firaaqóo mapáraaida rufíaidaqa ufa qíranara randée márufanoo Peetooroofa Yísuna áaramáseenoo qinau Óo ufasáa rakísira maasá maaqóo márunanoo ámiqimminoo amanée maasá maaqóo úqiqaana maqa qaaramoo áuquanauree, aníara moo Móoseenara moo Éerianara moo úsakáanauree. Rufíaqa rufíaqidanoo ufa qíranara randóosia miqí qinau. Miqí qímasoofanoo asuru fannoo aniréenoo aiqáma misá dukúnimaqasoofanoo asurukíqari ufa moó kambíqeenoo maaqí qinau. Maafá qiní qímuqusira qímaaku márifa, ínnee miná ufa kái íriaqa. 8 Yísuna faiqinámu mi-ufána iriséeqa káqi káqi miqóo múnu randée míni randée ufanoo, sía faiqí miqóo márufanoo Yísufa kai miqóo misá faqa márinau.

9 Mi-ainaináfa taikóofaqa misá Yísuna saimbaqa mi-aaqannásaaqari óoqu fímarufanoo Yísufa maaqí qímasee afeekaikámándee qímanniminau. Ínnee meerái áaqanasaa qáfaanara óoquree sía uqanna qímannimiaqa. Qinée faiqí nímaaku kúqiranakiqari fíndi fúannaqoo miqóo kai qímannimiaqa. 10 Mi-faiqinamúsa eedóo qímasee sía qímannimiqau, Yísufa kúqiranakiqari fíndifuaninnara minára kai narí qímami narí qímami umeé kai qímariqau. Misá miqí qídaqa Yísuna irámiriqa qiqau, Mooseena sándufa akoofásauqa minakíqari maaqí qídaqa. Faiqí moó fannoo Eeriaafarafoo qíra fasiqa mifá náaree fíndifumáfinanoo miqóoqari Ánutuna ásauku mundírafa kambíqaannoo fee qídaqa. Misá miqí qídaqa nánee fee qídee miqí qídee qufanoo Yísufa maaqí qímasee qímanniminoo qinau. 12 Kúqaa Eeriaafará foo kambíqafinoo ásauku mundírausa qinée ániannanara deedaqínoo. Dóo qinée ínni qímannimidaqa. Dóo Eeriaafara foó moo áuqu Yoohaneefa nammári nímimarufa dóo óoqai kambíqafi márufaqa faiqí ánaasee akaqáusa sía írirai tamummáqarausa ufamáu fíqa nári mandá nídiranakóo maréeqee miná kúqa̱rusaqau. Qinée kafáa ínnimma irámmirianaura tamummáqara fasiqauqa nánaree misá faiqí nímaakuara aupúrarana firaaná amiséeqa maréeqee áquseefaree.

Yísufa kumaaráa aundurái áfaanna aqiqanau.

(Mataioo 17:14-21; Ruka 9:37-43)

14 Misá miqí qímammaree áaqanasaaqari óoqu fíufaqa Yísuna faiqi námu akaqáusa sía óoru fúsa máruqoo óoqu paqúrimasee faiqí ánaasee moómoosa súqimarufaqa óoqu níndafaqau. Mooseena sándufasaa rakísimarusa akaqáusa miqóo faqa máridaqa Yísuna faiqi námu faqa ufa rainée maríqau. 15 Faiqí ánaasee Yísuna qáfamásee tautúmasee sandée mifúnnai óonureeqa ámandaqau. 16 Yísufa aniréenoo narí faiqi námu qímanniminoo qinau, nána ufaree ínnee Mooseena sándufasaa rakísi maríasa faqa ufa raináidee qufanoo faiqí moó fannoo faiqí ánaaseekiqari Yísuna qímaminau. Qinée qeeqá qímaaku áfiqee anée íanannai ánidaqa. Mandá afaanna fannoo miná aunduráki kéeqafi márifanoo síamma ufa qídanoo. 18 Mi-afaannáfa mi-faiqína árifanoo maqásaa kuqakí kuqakí áqufifanoo áiku ásauku pipisaaqá qusufifanoo ámaaqini datímambifanoo óokiqari qáqaara kai aniráidanoo. Qinée aní faiqi námu maaqóo máriasara áfaanna áfaqaaqee qúnaqa misá miqíafanoo sía amanaikífaqa aní qímamidaqa.

19 Yísufa iriséenoo aiqáma faiqí ánaasee qímanniminau. Ínni firaaqóo uqanna sía írirana qinísaa rusímarifanoo qinée kísaaqasaa fee ínni mandá fúrufarira ummaara dadaaqiqá nuanáuree. Mi-kumaaraaná áfiqamaree maí ániaqa qufaqa misá mi-kumaaraaná áfiqee múnusoofanoo minakínaa áfaanna fannoo Yísuna qáfamaseenoo mi-kumaaraaná maréeqeenoo fúseenasana áaku amaqáseenoo maqásaa rutúku quqásoofanoo mi-kumaaraafá maqásaa áqufinoo quanda qáandi marufanoo qáqaara óokiqari ururáma téeqinau. 21 Yísufa miná ákoona irámmirinoo qinau maafá kísaaqasaa maaqínoo mári fee qufanoo miná ákoofa qinau Eeóo faiqi ánaaqisaaqari miqí marínau. 22 Moómoo kari mi-afaannáfa miná kúqarúanee qímaseenoo idáki fee nammáriki fee káqi mara áqi marúfa máridanoo. Anée amanaikínana maasára ámuqusinana dadaaqía. 23 Yísufa iriséenoo qinau sía qiníara amanaikíannee qía aneenná kai qinísaa írirana rusíranara kai íria. Faiqí Ánutunasaa írirana rusímarifa aiqáma ainaina amanaikámmiannoo.

24 Mi-kumaaraaná ákoofa miná iriséenoo fáaqa quqáseenoo Yísuna qímaminoo qinau eeóo qinée anísaa írirana rusímarunausa máridaqa sía amanaikídaqa anée dadaaqía qufanoo Yísufa faiqí ánaasee díndari díndari ani usufufanoo níndafeenoo misá qiní ititáqimaqéefoo qímaseenoo mi-kumaaraaná aundurákinaa áfaanna amambainá qímamiseenoo qinau. Qinée aní qímamidaqa mi-kumaaraaná aundurákiqari rafúdamaki sandámáfinana sía uqanna kafáa ani kéeqaa qufanoo mi-afaannáfa fáaqa quqáseenoo firaa fuseena sana mi-kumaaraaná áaku amaqáseenoo maqásaa rutúku quqáseenoo dóo ráudamaki sandámáfufanoo mi-kumaaraafá kúqiara foora maqásaa rúmafufanoo áiku ásauku pipisaaqá qususéenoo kúqiara foora mámbinau. Miqí mámbufaqa faiqí ani qáfee dóo kúqiifoo qiqau. 27 Miqí qufanoo Yísufa miná ásauku qumároofanoo dóo fíndi finau.

28 Miqóoqari Yísufa moo máqaki kéeqafufaqa miná faiqi námu kukéeqasee anirée irámmiriqa qiqau. Maasá nánaree mi-kumaaraaná aundurákinaa áfaanna aqiqárara anúqi fee qufanoo Yísufa qinau Ánutunara innaaruqírafa kai miqíra áfaannauqa niqiqáina fifáranoo sía moo áinainannái niqiqeefáranoo.

Yísufa narí kúquaninnanara qímanniminau.

(Mataioo 17:22-23; Ruka 9:43-45)

30 Misá mi-maqusánaindari quqásee Kariree máqa maaqaki narí faiqi námu faqa faiqí ánaasee sía íriaqee qímasee narí faiqi námu óosana óosana ufa qímannimiani qímaseenoo fídanoo Kariree máqa maaqakiaqa fídanoo qímanniminoo finau. Mifá maaqí qímasee qímanniminau. Faiqí misá qiní faiqí nímaaku qumáre̱eqee faiqí nísaukuki quqáqisáifaqa misá qiní kuqá darusáifanoo qaaramoo fáasaana áiqaráinanoo Ánutufa kúqiranakiqari qiní mara fíndifumáqisaannoo. 32 Miná faiqi námu mi-ufána iriséeqa sía miná óosanara íriqau irámmirirana faqa sía irámmiriqau rufíasee káqi máriqau.

Yísuna faiqi námu yáfee maasáki úriqararafa máridanoo fee.

(Mataioo 18:1-5; Ruka 9:46-48)

33 Misá Kapeeranaumma máqusai aniréeqa máaqaki kéeqafufanoo Yísufa narí faiqi námu irámmirinoo qinau. Maasá aanái ánimarunaqa ínnee nána raiqára úfee qífee misá nisaurúsee sía qímamiqau. Misá nárikiqari yáfee úriqararafa máriannoo qímasee minára raiqéeqa nisaurúsee sía Yísuna ufa qímamiqau. 35 Yísufa óoqu marifínoo narí faiqi námu aiqáma náaramasee maí ániaqee qímasee maaqí qímasee qímanniminau. Faiqí moó fannoo maqásaa máriasaki úriqararafaikínafa mifá narí kai uréeqaranaki fúannoo mifá aiqámausa dadaaqídanoo ámiqira saika faqa níkooqeemari saikána faqa dadaaqíannoo. 36 Yísufa miqí qímaseenoo faiqi ánaaqi moodáa maréeqee misá nóorinni kikíqamaseenoo ásaukunnai miná káqaramma qumáreenoo qímanniminoo qinau. 37 Faiqí ánaasee moó fannoo maaqíra káqikaa faiqi qiní ufara irisée óonu asasamásee áqoondikinafa sía írirainni qiní Yísusa faqa qíqoondikidanoo. Yáfee moó fannoo qiní óonu qífiqainafa sía qiní kai qífiqaannoo qiní diqiqoona faqa óonu áfiqaidanoo.

Moó fannoo Yísuna áuqusaa áfaanna aqiqanau.

(Ruka 9:49-50)

38 Yoohaneefa Yísuna qímaminoo qinau, Óo ufasáa rakísirafa faiqí moó fannoo moosáa mandá fáafasaaqa naundurái máriasa aní áuqusaa qímasee niqiqéemaru qáfaqiafana, mifá sía maasáki nímarufa márunara qáoo qiqíafana. 39 Yísufa miná iriséenoo maaqí qinau sía minára qáoo qía. Mifá qiní dúqusaa moo fíraa ainaina áuqamáseenoo sía amana quándaki qiní díqiannoo. 40 Maasá aaná ititée maríasa maasá namuqáa máridaqa. Sía maasá aaná ititée maríasa sía namuqáa máridaqa maasá qifeeqáree maríasa máridaqa minára sía mi-fasiqánara qáoo qía. 41 Ínnee maa-ufána íriaqa Ínnee nammáriara nídinaqa innaaru qífanoo faiqí moó fannoo ínniara ásauku mundírana faiqi námu máriafanoo fee qímaseenoo nammári ínni níminanoo Ánutufa miná akiaqara mi-fasiqána innaarúnai qúqamaqáannoo.

Káqi rúnna maréeqee quqárafa miná ákiaqara úriqararafa.

(Mataioo 18:6-9; Ruka 17:1-2)

42 Miqí qímaseenoo Yísufa mi-kaqikaa faiqína fáasai misá noórinni kikíqunara kafáa qímanniminoo qinau, maaqíra káqikaa faiqi írirana qinísaa rusímarinafa moó fannoo miná mandóosana uqafíqainafa mi-fasiqáfa Ánutuna firaa aqurararana ámeemaanai maríannoo. Misá miqínna fasiqana qumáree firaa oonitia anukakí quqásee rumbásee afeeqá ámifanoo ooruku námmariki áqufinoo kúqinoo óonu dúpira árirafa máriannoo. Káqikaa faiqi qinísaaqaraa írirana moosáa ubeekée marínafa firaa arirafa máriannoo. 43 Anínna ásauku fannoo anirarisámeeqeenoo mandóosanaki ubeekée marína miná ateeká áqua. Moodáa ásauku faqaafa náaru asumu máriranaki fírafa amaná máridanoo. Aiqáma ásaukuqara faqaafa náaru náaru sía qimbéemari idánaki fírafa mandáikirafa máridanoo.[ 44 Miqóo náaru náaru kadiaru sía kúqidanoo káqi máridanoo idá faqa sía dimbée marífa káqi qáida máriannoo.] 45 Aninná áiku fannoo aní rarisámeeqeenoo mandóosanaki ubeekáinnana mi-aikúna ateeká áqua. Anée moodáa áiku faqaafa náaru asumu máriranaki fírafa amaná mária. Aiqáma áikuqara faqaafa idáki áqufirafa sía andeeqánoo máriani.[ 46 Mi-idánaki faiqí néemaria kadiarusa sía kúqidaqa idá fannoo faqa sía qimbáidanoo.] 47 Aninná áfu áaqoo fannoo aní maréeqee Ánutuna ufamáu fíranakiqari káqinni ubeekée marína miná imbásaa. Anée moodáa áfu aaqoo faqaafa Ánutuna quqúsaki kéeqarana amaná mária. Qaara afu aaqoo faqáafa idáki áqufirafa sía andeeqánoo máriani. 48 Miqóo faiqí néemaria kadiarusa náaru náaru sía kúqidaqa idá faqa náaru náaru sía dimbáida káqi qáida máridanoo. 49 Ánutufa idá qumáreenoo nimanamándee qáfarana ooruku anoonara foora aiqáma qúsasaa adía nimaqáinaqa Ánutuna ufasáa mapukúfi máriaqeera nimaníannoo. 50 Ooruku ámiqira ainaina máridanoo miná adíafaa irafa taikáfinanoo náqimmásee adíafaairana máraannoo fee sía amanaikíannoo. Ínnee ínneeqa naunduráki narínni narínni ooruku faqáasara foora máridaqa narínni narínni asooáranaki máriaqa.